Zehiniň we erjelligiň miwesi: suratkeş Aýnur Karowa bilen söhbetdeşlik
🎨 Sungata düşen ilkinji ädimler
🌟 Ariyanyň döredijilik taryhy 4 ýaşyndan başlaýar. Ol hat ýazmagy öwrenmezinden ozal, surat çekmegi özleşdirýär. Kiçiliginden boş wagtlarynyň hemmesini diňe surat çekmäge bagyşlan bu ýaş zehiniň sungat ýoluna höweslendiren esasy adam ejesi Gözel Karowa bolup durýar. Şonuň ýaly-da, maşgalasynda şahyr Durdy Karowyň bolmagy hem oňa edebi we ruhy täsirini ýetiripdir. Gyzykly ýeri, maşgalasynda ondan başga hünär derejesinde surat çekýän ýok.
Kynçylyklary ýeňen erjellik
✨ Ariyanyň suratkeşlik ýolundaky iň uly üstünlikleriniň biri – özüni kämilleşdirmekdäki erjelligidir. Ol heniz 2 ýaşyndaka başdan geçiren bagtsyz hadysasy sebäpli sag goşaryndan mahrum bolýar. Emma bu ykbalyň synagy onuň sungata bolan höwesini gowşadyp bilmedi. Tersine, ol çep el bilen surat çekmegi kämil derejede öwrenip, soňra bolsa sag eliniň beýleki böleklerini ulanyp, ýörite usullar bilen öz çeperçilik başarnyklaryny has-da kämilleşdirdi. Bu onuň gaýduwsyzlygynyň we zähmete bolan çäksiz söýgüsiniň iň ýokary görkezijisidir. Surat çekmek onuň üçin diňe bir hünär däl, eýsem durmuşyň manysydyr. 💖
Millilik we döwrebaplyk utgaşmasy: “Ariýa creator” haryt nyşany 🌍
Suratkeşiň işlerinde millilik we döwrebaplyk sazlaşykly utgaşýar. Ariya türkmen zenanlarynyň gözelligini öz suratlarynda gaýtalanmajak derejede şöhlelendirýär. Ol sungatynyň çägini öz ýurdy bilen çäklendirmän, eýsem Russiýa, Dubaý, Malaýziýa, Azerbaýjan, Belarus we Amerika ýaly köp sanly daşary ýurtlara hem öz eserlerini ýetirmegi başardy.
Döredijiliginiň başynda sumkalara surat çekmekden başlan suratkeş, häzirki wagtda futbolka, kostýum ýaly eşiklere hem özboluşly dizaýnyny berýär. Bir köýnegiň ýa-da eseriň üstünde işlemek üçin 4-5 günden 20 güne çenli wagt sarp edýär.
📚 Ylham çeşmesi we maslahatlar
Ariya ýaşlygyndan psihologiýa uly gyzyklanma bildiripdir. 11-12 ýaşyndan başlap, Robert Kiýosaki, Napaleon Hill, Wiktor Frankl ýaly ýazyjylaryň kitaplaryny okapdyr. Ol özüni ruhlandyran kitaplaryny şeýle sanap geçýär:
• “Baý kaka, Garyp kaka” – edýän işiňi söýmegi öwretmek üçin.
• “Wawilonyň iň baý adamy” – maliýe maýasyny döretmek boýunça.
• Durmuşa “Hawa“ diý – öz pikirleriň bilen kynçylyklary ýeňip geçmek üçin.
Häzirki wagtda 20-den gowrak okuwçysy bolan Ariya, hatda 16 ýaşyndaka 32 ýaşly okuwçylaryna hem sapak beripdir. Ol öz master-klaslaryny yzygiderli geçirýär. Ýaş suratkeşlere öz arzuwlaryna ýetmek üçin berýän esasy maslahaty bolsa – öz işiňi söýmek we erjellik bilen öňe gitmekdir.
Bu heniz onuň ýolunyň başydygyny aýdýan Ariya, geljekde has uly taslamalary we sergileri durmuşa geçirmegi maksat edinýär. Onuň sungaty, zähmetiň we söýginiň birleşende nähili ajaýyp netijeler berip biljekdiginiň janly mysalydyr. Ol geljekde öz brendini ösdürip dünýä derejesine çykarmagy maksat edinýär. 🎯
🌐 Sosial sahypalar: @ariya.creator.
📍 Salgysy: Gülzemin SDAM, 3-nji gat.