Fizika VIII synp

Gadyrly okuwçylar! Siz 7-nji synpda fizika dersini öwrenip, onuň tebigat baradaky ylymdygyna göz ýetirdiňiz. Maddalaryň gurluşy, dürli hallary hem-de olary düzýän bölejikler barada başlangyç maglumatlar aldyňyz. Jisimleriň mehaniki hereketini, özara täsirini, tizligini, massasyny beýan edýän kanunlar bilen tanyşdyňyz. Sürtülme güýji, olaryň görnüşleri we sürtülmäniň ýüze çykýan ýagdaýlary, peýdaly hem-de zyýanly taraplary babatda bilimlere eýe bolduňyz. Gaty jisimleriň, suwuklyklaryň we gazlaryň basyşynyň nähili kanunlar boýunça bolup geçýändigini we ol kanunlara esaslanyp döredilen tehniki desgalaryň nirelerde ulanylýandygyny öwrendiňiz. Siz 8-nji synpda fizika dersi boýunça 7-nji synpda alan bilimleriňizi çuňlaşdyrarsyňyz. Iş, kuwwat, energiýa düşünjeleri we energiýanyň bir görnüşden başga bir görnüşe geçmegi ýaly hadysalar bilen tanyş bolarsyňyz. Jisimleriň deňagramlylyk ýagdaýlary hem-de olary häsiýetlendirýän fiziki ululyklar barada düşünjeler alarsyňyz. Okuw kitabynyň ýylylyk hadysalary bölüminde jisimleriň içki energiýasy, içki energiýany üýtgetmegiň usullary, ýylylyk geçirijilik, konweksiýa, şöhlelenme we ýylylyk hadysalaryna degişli başga- da birnäçe düşünjeleri öwrenersiňiz. Şeýle hem, bu bölümde ýylylyk hadysalarynyň ulanylyşyna degişli birnäçe tehniki desgalaryň hem-de enjamlaryň işleýşi bilen tanyş bolarsyňyz. Ýagtylyk hadysalary öwrenilende ýagtylygyň çeşmeleri, ýaýraýşy we onuň beýleki fiziki häsiýetleri bilen tanşarsyňyz. Gadyrly okuwçylar! Siziň adamlaryň durmuşynda ulanylýan häzirki zaman tehniki enjamlaryň işleýşine hem-de tehnologiýalara düşünmegiňiz we olary ussatlyk bilen ulanyp bilmegiňiz üçin fizikanyň ähmiýeti örän uludyr. Şeýle hem fizikanyň matematika, himiýa, biologiýa, geografiýa ýaly dersler bilen çuňňur arabaglanyşygy bar. Şonuň üçin bu dersleri hem oňat özleşdirmegiňize fizikanyň kanunlaryny oňat bilmegiňiz ýardam eder. Şonuň üçin hem siz eliňizdäki okuw kitabynda berilýän her bir temany üns berip okap, olara degişli ýumuşlardyr laboratoriýa işlerini ýerine ýetirmelisiňiz. Bu bolsa siziň her biriňiziň geljekde bilimli, işine ökde hünärmenler bolup ýetişmegiňize ýardam berer.

Ýüklemek üçin ilki ulgama girmeli