Fizika IХ synp

Gadyrly okuwçylar! Siz 7-nji we 8-nji synplarda maddalaryň gurluşyny, jisimleriň mehaniki hereketini, özara täsirini, tizligini, massasyny hem- -de gaty jisimleriň, suwuklyklaryň we gazlaryň basyşyny beýan edýän kanunlary, şeýle hem mehaniki işe, energiýa, kuwwata, jisimleriň deňagramlylygyna, ýylylyk we ýagtylyk hadysalaryna degişli okuw maglumatlaryny öwrendiňiz. Şol kanunlara esaslanyp döredilen häzirkizaman tehniki desgalaryň nirelerde ulanylýandygy bilen tanyş bolduňyz. Siz 9-njy synpda biziň gündelik durmuşymyza giňden ornaşan elektrik, elektromagnit hadysalaryna we mehanika degişli kanunlar hem-de birnäçe fiziki abzallaryň gurluşy we işleýşi bilen ýakyndan tanşarsyňyz. «Elektrik hadysalary » bölüminde elektrik zarýady, elektrik meýdany, elektrik togy, elektrik naprýaženiýesi, elektrik togunyň we naprýaženiýesiniň kanunlary, «Elektromagnit hadysalary » bölüminde elektrik togunyň magnit meýdany, hemişelik magnitler, elektromagnitler, elektrik togunyň generatory, transformatorlar, elektrik ölçeýji abzallar, elektrik, magnit hadysalary, olary häsiýetlendirýän fiziki ululyklar, olaryň fiziki manysy we ölçeg birlikleri barada düşünje alarsyňyz. «Mehanika » bölüminde kinematika, dinamika we saklanma kanunlaryna, mehaniki yrgyldylara we tolkunlara degişli okuw maglumatlary bilen tanşarsyňyz.

Ýüklemek üçin ilki ulgama girmeli